Sta 36a edizione, organisata da a casa rurale di Montegrossu, adduniscerà un’altra volta pruduttori, artigiani è visitanti, sapè fà è gastronumia ingiru à un arburu emblematicu di u patrimoniu corsu dapoi tanti seculi. Fora di e tastature è animazione, l’evenimentu serà l’occasione d’evucà e sfide di una filiera fragilisata da i prublemi climatichi. L’EARL Arburi Cesari di Ghisunaccia chì hà vintu u cuncorsu regiunale di l’olii d’oliva AOP, serà ricumpensatu durante l’inaugurazione ufficiale stu sabatu à 11 ore è mezu. D’altrò, a fiera serà u locu d’annunzi impurtanti pè l’avvene di a filiera. Sabbatu à 3 ore, a cuuperativa oglicula di Balagna presenterà u so prugettu di rimpiantazione in Lozari è a so ristrutturazione. L'ogettivu hè mudernisà l’arnesi di franghjera, d’accantera è di cumercialisazione pè accumpagnà i pruduttori contr’à i prublemi climatichi è e variazione di pruduzzione. A fiera permette dinù di capì megliu u travagliu di l’oglicultori. In più di e demustrazione di franghjera, u publicu puderà participerà à tastature d’olii AOP “racolta nant’à l’arburu” è “racolta à l’antica” In st’ultima racolta, sò racolte l’olive cascate da per elle in e rete sott’à l’arburi.

Dopu, Ruben l’ortulanu prupunerà a putera d’olivi sabatu à 6 ore è dumenica à 5 ore pè fà scopre à u publicu u travagliu ingiru à l’arburu. In stu quadru, attelli d’insitera di l’olivi sò organisati d’aprile pè insignà st’attività piuttostu chè di pone arburi novi. St’olivi salvatichi ùn anu bisognu d’esse annacquati postu ch’elli anu un sistemu di radiche maiò. In più, u so intrattenimentu para i fochi è permette à e pecure di pasce. D’altrò, durante sti dui ghjorni, cultellaghji corsi rialiseranu demustrazione di stazzona mentre chì i sculari di Monte Maiò presenteranu mostre nant’à l’olivu, e bestie lucale è e tecniche tradiziunale di racolta. Prudutti corsi di gastronumia è artigianali seranu dinù in vendita. Infine, ogni sera, sò previsti cuncerti à parte da 7 ore è mezu. I Canterini è Sumenta Nova u sabbatu mentre chì Scambiu Corsu è Maì Pesce canteranu pè un ultimu cuncertu dumenica sera. L’attelli, e demustrazione è e mostre sò di rigalu.