L’associu organisadore, A Leva, creatu da Dominique Fratani in u 1996, hà sceltu stu nome traduzzione corsa di u tourne-bille, un arnese di l’anziani mistieri furestieri. St’associu hè natu da vuluntà di preservà è di trasmette i sapè fà in leia cù a furesta è u legnu in Corsica. Dapoi tandu, addunisce artigiani, prufessiunali di u legnu, istituzione è publicu ingiru à a festa di u legnu è di a furesta. L’evenimentu hè una mostra viva di u patrimoniu furestieru corsu, mettendu in risaltu a ricchezza di e nostre fureste, l’imbuche di l’ambiente è l’avvene d’una filiera essenziale pè l’econumia corsa. In core di Vezzani è in a furesta di Padula, u publicu pò scopre artigiani di u legnu : legnaghjoli, scultori, cultellaghji, stazzunari, spurtaghji, turnidori… Sò previste dinù demustrazione di segheria, intempiadori, bancalari, liutaiu…

Pè a prima ghjurnata, u 18 di lugliu, in Vezzani : vendita di prudutti artigianali, animazione per i zitelli dirette da A Rinascita cù duie volte di più attività chè l’annu scorsu. 5 ore : Cuncorsu di tagliera d’arburi cù Joseph Vincensini. A 7 ore : apperitivu musicale, da beie è da manghjà è cuncertu cù u gruppu Ci campemu. U 19, in furesta di Padula, nant’à a cumuna di Nuceta: animazione per i zitelli, presentazione di u travagliu di i sculari di Vezzani nant’à a furesta, mostra di u cuncorsu di pittura nant’à a furesta, spassighjata di scuperta in furesta, demustrazione di travaglii furestieri, duie ore : cunferenza di Valère Serra nant’à a filiera di u suvaru di Corsica. 3 ore : cunferenza di Carine Franchi nant’à a qualità, arnese di sviluppu di a filiera castagnicula corsa, presentazione di l’AOP farina corsa è l’azzione fatte ingiru à l’arburu à pane.