Ind’un quadru magnificu à u pede di u San Petrone, sta fiera agricula muntagnola v’accoglie pè una visita ind’u mondu agrupasturale di a regione. À u prugramma : mercatu cù pruduttori, prudutti corsi è artigianali, mostre, demustrazione di sapè fà cù fabricazione di brocciu, nicci, sporte, cuncorsi d’animali paisani, cunferenze è ghjochi per i zitelli, spassighjate à pedi è à cavallu. Vendita à l’asta di bestiame trà allevadori è macellari.

Cunferenze è reunione nant’à l'agricultura, a qualità di i prudutti, u castagnetu, u pasturalismu è u patrimoniu corsu, animazione pè a famiglia, musiche è balli tradiziunali. Specialità corse fatte cù u spetu, da beie è da manghjà. A messa in San Petru d’Accia sabbatu u primu d’aostu à cinqu’ore. Infine, i cuncerti : venneri u 31 di lugliu à 9 ore cù u gruppu EPPO, sabbatu u primu d’aostu : I Voci di a Gravona à 9 ore è mezu è dumenica u 2 cù I Frutti à 9 ore.