Natu in u 2014 da a vulintà d’Iviu Pasquali, u so capimachja, l’associu « A Guardia Papale », chì hà fattu un travaglione nantu à sti Corsi ch’eranu i guardiani di u Papa in tempi di a Roma antica, vole mantene a fiara. Per quessa, urganiseghja, tutti l’anni una messa celebrata in Roma è una prucessiò, cunferenze è animazione diverse in Corsica è altrò.

Ceremonie sò dunque previste i 25 è 26 di lugliu. una messa hè celebrata è cantata in a ghjesgia San Crisogono, a « ghjesgia di i Corsi », in core di u quartieru Trastevere, cugnumatu dinù u quartieru di i Corsi. U « rituale », ellu, ùn cambia micca. A messa celebrata a matina, una cena a sera rigalata da l’associu cù canti è musiche-, è una prucessiò tamanta a dumenica traspurtendu a Madonna Fiumarola. « Quist’annu, ci serà una serata cantata u vennari, diffusata nantu à « radiu Vatican ». Participerà dinò l’arcicunfraternita del Carmine di Roma, liata, ci vole à dilla, cù a cunfraternita San Ghjaseppu di Bastia. »

À traversu l’associu, a Corsica è masimu a « Guardia Papale », hè cunnisciuta in Roma. « Sò statu ricevutu da u Cardinale Parolin, assai vicinu di u Papa, spiega torna Iviu Pasquali, u Papa hè à capu di l’esistenza di l’associu è, di sicuru, di a Guardia Papale… »

A squadra cerca, avà, una ricunniscenza in Corsica. Era prisenti quand’ellu ghjunse u Papa Francescu in Aiacciu u 15 di dicembre di u 2024, Iviu Pasquali li vulia dà una canzona dedicata à a Guardia, « l’avemu cantata ma ùn l’aghju pussutu rimette à u Papa. Mi seria piaciutu à salutà lu, micca à nome meiu ma à quellu di a Guardia Papale…Forse, ghjunghjerà un ghjornu. »

Intantu l’associu prusegue a so strada fendu cunnosce a storia in e scole, à traversu cunferenze in Roma è altrò, cù a cappella di Pedicroce induve issa storia quì hè spiegata…I Corsi, elli, s’approntanu à parte in Roma u 25 di lugliu. È seranu, torna una volta, belli numarosi…