In lingua corsa, hè stata premiata a racolta bislingua “De toute éternité”, di François Cucchi à l’edizione Omara. A cuerenza di sta racolta di dodeci nuvelle corte hè in leia cù un sugettu mischjendu l’epuche è i lochi pè trattà di a cunquista, di a duminazione, di l’esistenza di u male, di u campà cum’ellu si pò. François Cucchi imagineghja i destini di persunagi diversi, ghjente ordinaria in situazione chì rimandanu à un cuntestu storicu è chì devenu fà scelte cuntradittorie. Mettendu in risaltu u so candore, u so curagiu è a so grandezza ma dinù a so vigliacchezza, e so azzione vergugnose è i so vituperii, l’autore s’interrugheghja nant’à a natura umana è a so evuluzione. François Cucchi, à a fine di e so nuvelle, invita à a riflessione

Passiunatu di litteratura, stu scrittore pumuntincu hà ricevutu in u 2024 u premiu Altaleghje di a nuvella pè u so testu “Da quandu u mondu hè mondu’. Cunfirmeghja oghje ghjornu u so talentu signendu u so primu libru publicatu in corsu è francese.

In lingua francese, u premiu di i lettori hè statu attribuitu à u rumanzu "La forêt de flammes et d’ombres", d'Akira Mizubayashi à l’edizione Gallimar

Akira Mizubayashi hè un scrittore giappunese chì scrive dinù in francese. Ghjè ancu traduttore.

A situazione rumanzesca hè a partenza di giovani pè a guerra trà a China è u Giappone chì hè stata un scumpientu pè i giappunesi trà morti è feriti. Un intrigu è stonde inaspettate chì spuntanu. A musica cusì presente in a so opera, chì permette resilienza, hè quì accuppiata à a pittura, à l’impurtanza di l’arte pè Mizubayashi. Truvemu dinù persunagi bravi ma ancu di canerchaja chì aiutanu i debuli. Da quì a storia vi tene cù scene dramatiche ma cù una narrazione serena, forse in leia cù a serenità giappunese, u stile, l’anima giappunese di l’autore avendu una lingua francese simplice ma elegante. L’autore scrive direttamente in francese cù talentu è finezza.