St’evenimentu volta pè un’ottesima edizione cù u listessu spiritu di prugrammazione. Cusì, si ritrovanu i passiunati di stu strumentu à tempu tradiziunale è chì permette di fà leie cù u mondu sanu. Ma vole dinù risponde à a necessità di mette in risaltu è trasmette a mandulina postu chì i so fabricanti sò sempre di più scarsi in l’isula. I rispunsevuli di stu festivale anu decisu d’addunillu à u Festivale Internazionale Mandolinistico di Savona, in Italia, direttu da Carlo Aonzo. Una cullaburazione strategica chì permette di mette in cumunu i mezi è di fà vene musicanti famosi. Cusì, u publicu puderà scopre in Corti a tunisiana Farah Fersi, virtuosa di u qanun, un strumentu arabu, è u mandulinistu americanu Radim Zenkl, chì hà vintu in particulare l’US National Mandolin Champion in u 1992. Sta ghjunta permette à a Corsica di ritruvà a so piazza à l’Internaziunale cù stu picculu strumentu. A musica brasiliana, tunisiana, di a republica cecca serà dinù à l’onore.

Cusi, dumane, à parte da 5 ore, u festivale principierà in e strette di u vechju Corti cù a girandulata di i mandulinisti curtinesi è di u rughjone sott’à a loghja di a chjesa è dinù nant’à a stretta Sculiscia. A parte da 6 ore, un scontru pedagogicu vi ferà scopre u sapè fà di l’artigiani liutaghji isulani. Dopu, una cunferenza serà animata da Farah Fersi à 7 ore è à 9 ore, apperitivu musicale cù Mandeo nant’à una scena aperta à tutte è tutti pè stonde musicale impruvisate.

Dumenica, seguita di a festa à 5 ore cù a girandulata, a cunferenza à 6 ore nant’à u tema “choro è mandulina, da u Brasile à a Corsica” cù invitati surpresa. U choro hè un generu è stile musicale strumentale pupulare è ballarinu natu in Rio de Janeiro à a fine di u XIXu seculu. A 7 ore, l’’Estudiantina Curtinese, l’Estudiantina di Corsica è a curale L’Orsulina participeranu à l’animazione musicale sin’à 9 ore nanzu u Terzettu Ange Lanzalavi, u chitarristu Jérôme Ciosi è l’organettistu Bruno Tafani. Infine, canterà u gruppu Eppo pè compie a serata.