Natu in u paese di Carticasi, u gruppu feminile Scontra, Roxane Terramorsi, Laura Clauzel è Lehna hà creatu un primu dischettu acusticu d’ondeci tituli in ottu lingue. Un prugettu impegnatu induve cantanu in e chjese è cappelle cù un solu micro è quasi senza strumenti musicali pè imbellì e so armunie vucale. E trè canterine si sò scuntrate durante u primu festivale Alti Casi pè un prugettu chì devia esse di corta durata. 

Ma, in fatta fine, e so voce si sò addunite bè cù l’apprubazione di u publicu è anu decisu di cuntinuà. Anu travagliatu cù Martina Catella, etnomusicologa, chì li hà fattu scopre stu viaghju di lingue in corsu, talianu, grecu o portughese per esempiu cù u piacè di fà sente è viaghjà tutte ste sunurità postu chì a musica ùn hà cunfine. Infine, u dischettu ùn si sente micca in streaming.