Spondi hè casa d’edizione corsa in leia cù l’edizione Le Bord de l’eau. U so ogettivu hè di sparghje u pensà, a cultura è a lingua corsa in l’isula è in altrò pè falla capì u più pussibule. Difatti, sta lingua è sta cultura meritanu d’esse parlate è cunnisciute in u mondu sanu. L’autore Jean-Luc Santoni hè frà altru insignante in lingue è culture corsa è taliana. Stu “Dizziunariu - U Pumuntincu” hè u risultatu di l’ambizione purtata in cullaburazione stretta trà l’Accademia di Corsica è a Cullettività di Corsica, pè fà di a Scola in Corsica una scola arradicata, esigente, inclusiva è aperta nant’à u so territoriu cum’è nant’à u mondu. Un’opera in u quadru di u prugettu accademicu Scola 2030.

U Pumuntincu hè cuncepitu cum’è un arnese pedagogicu di riferenza pè permette à l’elevi, i studianti, l’insignanti è e famiglie di cunsultà un puntellu linguisticu illustrendu a ricchezza è a diversità di a lingua corsa. Jean-Luc Santoni, cuscente chì a pulinumia hè un fundamentu di l’insignamentu di u corsu, offre ici un arnese di sustegnu à a varietà linguistica. Ghjè una vera memoria viva pè ritruvà sunurità, spressione, pè trasmette à e nove generazione una lascita preziosa è minacciata.

A traversu i parlati di u Talavesu è di u Rucchisgianu, stu libru sprime cun forza chì a diversità di i parlati ùn hè micca una debulezza di a lingua corsa ma una di e so più grande forze. Di più cà un dizziunariu, stu libru participeghja à una scola isulana fiera di i so radichi chì apprunta i sculari à l’asigenzi di u mondu d’oghji : una scola di a leia, una scola di u sensu, di a cunfidenza, una Scola 2030.