Sabbatu u 22 d'aostu à parte da 6 ore, l’associu Aleria 75 hà da cumemurà stu ghjornu storicu nant’à u situ di l’anziana cantina Depeille cum’ella face dapoi u 2014. Un annu dopu u cinquantesimu, a ceremonia vole mantene a primura di a trasmissione di sta pagina di storia, in particulare à e generazione future. Cù i discorsi à vene di i so membri, l’associu rivenerà nant’à sti ghjorni d’aostu 75 ma dinù u so cuntestu, a vuluntà di i militanti di l’ARC, a viulenza è e so ragiò. A cumemurazione serà fundata nant’à u situ di memoria inauguratu l’annu scorsu. Difatti, sin’à tandu, ùn ci era nunda chì precisava l’impurtanza storica di u locu. L’associu Aleria 75 hà dunque stallatu elementi à tempu memuriali è didattichi pè fanne un spaziu memuriale cumpletu. Un maghju d’una qundecina di metri hè statu custruitu, duie stele sò state rinnuvate o create, un affrescu stallatu è i spazii à l’ingiru sò stati puliti.

Fora di a memoria, ci hè un aspettu pedagogicu. Sta mostra in trè lingue permette oramai à tutt’ognunu di scopre o di sapenne di più. Si custatta una curiosità è un interessu chì nasce, una trasmissione principia è cusì campa a memoria. A dimarchja di st’associu hè in leia cù i fatti è a storia, micca cù un partitu puliticu. Sta storia appartene solu à a Corsica è à i Corsi. Daretu à sta cumemurazione, l’associu vole fà campà a memoria micca solu durante i grandi appuntamenti ma tuttu l’annu.