À 25 anni, u giovanu curtinese Mathieu Mattei hà creatu u so ghjocu video in lingua corsa dopu à dui anni di travagliu. Di-Drift hè dispunibule in accessu anticipatu nant’à Epic Games (store.epicgames.com). Cusì, u screnu d’accolta, l’ogettivi, e cumande, l’indicazione…  sò in corsu. Pè Mathieu Mattei, u ghjocu video ùn hè micca solu un divertimentu. Hè una manera di fà campà, di trasmette una parte di a so identità. A lingua corsa deve truvà a so piazza in e forme di creazione cuntempuranea, è dunque in u settore di i ghjochi video. Un circuitu, una vittura è a pussibilità di ghjucà contr’à cuncurrenti. U scopu hè di vince u più punti pussibule durante u tempu di ghjocu o ottene u migliore risultatu sin’à a fine di a partita. U so creatore cuntinueghja à migliurà a so opera è currege i bug signalati.

Di-Drift pò ricurdà un altru ghjocu video, Rocket League, mischjendu ghjocu à pallò è corsa di vitture. Un giovanu bastiacciu hè d’altronde campione di u mondu di stu ghjocu. Nanzu di creà ghjochi video, Mathieu Mattei hè statu un ghjucadore passiunatu di video. Hà in casa soia numerosi ogetti in leia cù u so universu. Da e prime Gameboy, i ghjochi nant’à PC sin’à l’ultime cunsole, s’hè pruvatu à tutti o quasi tutti i generi è furmati. Un interessu chì hè diventatu una brama di creà i so ghjochi. L’omu hà una furmazione in game design, ma ùn pò ancu campà di a so attività. U so d-drift, vendutu à 4,49 euri, hè dunque dispunibule nant’à Epic games. 83 persone l’anu digià compru, ciò chi suddisface u so creatore. Oramai, vole allargà a so diffusione nant’à PlayStation, Nintendo, Switch è Xbox. L’ogettivu finale hè di pudè campà di a creazione di ghjochi video. Intantu, Mathieu Mattei travagia nant’à un secondu prugettu, in leia cù u ghjocu Final Fantasy, u so ghjocu preferitu ma manc’appena in leia cù l’universu di e vitture.