Da u primu à u 4 di settembre, u paese di Canari accoglie a 23a edizione di u Cuncorsu internaziunale di cantu liricu in cunventu San Francescu. Un appuntamentu maestru pè l’amatori d’opera cù giovane voce di u mondu sanu. St’edizione principierà cù una serata in omagiu à Jacques Scaglia, fundatore di u cuncorsu, sparitu di settembre scorsu. Canteranu pè sta serata artisti maiò di stu festivale : Jean-François Borras, Inna Kalugina, Katleho Mokhoabane, Julia Knecht, Cristina Giannelli è Maurel Endong accumpagnati à u piano d’Olivier Cangelosi, cù a participazione d'A Ricuccata.

U lindumane, a cumpetizione principierà cù e prove eliminatorie. I candidati venenu da parechji paesi di mondu : Pologna, Brasile, Cameroun, Allemagna, Olanda, Serbia, Stati Uniti, China, Svizzera… A meza finale hè prevista u 3 di settembre à 3 ore. A grande finale venneri u 4, à a listessa ora, cù duie arie scelte da a ghjuria. Durante e deliberazione, i candidati micca finalisti puderanu dinù cantà pè pruvà à ottene u Premiu di u publicu. Cusì, dapoi u 2003, stu cuncorsu face di Canari un locu di scontru trà e grande voce di dumane è i prufessiunali di u mondu liricu. In stu paese di u Capicorsu, trà muntagna è mare, l’esigenza artistica si mischja à a cunvivialità pè offre un appuntamentu induve a musica piglia una dimenzione internaziunale quant’è umana.