Quist’annu, u festivale di e spressione vucale di u mondu sanu accoglie artisti ghjunti da i Stati Uniti, Iran, Irlanda, Italia, Brittagna, Argentina è Venezuela, vicin’à u gruppu A Filetta, fundatore di a manifestazione cù Svegliu Calvese. Dapoi u 1989, sti scontri tessenu un spaziu di dialogu scarsu trà tradizione vucale, culture è creazione cuntempuranee. L’evenimentu si fonda nant’à un’idea semplice ma putente : pruvucà u scontru. Quellu di e voce, di i ripertorii, di e lingue è soprattuttu di l’artisti chì venenu in Calvi pè sparte e so tradizione è imaginà inseme nove forme musicale.

Ogni sera, i canti di A Filetta aprenu a scena è accoglienu i gruppi invitati, in segnu d’uspidalità, una di e signature distintive di i Scontri. Cusì, a pre-apertura di u 14 di settembre accuglierà u gruppu Eppo cù u so dischettu D’ogni culore, musica corsa è accenti mediterranii. U lindumane, u cullettivu cureanu Liquid Sound, in creazione cù A Filetta, aprerà ufficialmente i Scontri ù Gosarisori, un prugettu inéditu à a crucivia di duie tradizione vucale corsa è cureana.

Dopu, u gruppu americanu Roomful of Teeth, accumpagnatu da u cumpunidore è canterinu Gabriel Kahane, presenterà stratti di a Partita for eight Voices, opera vucale senza accumpagnamentu musicale creata da Caroline Shaw è l’Elevator Songs (dischettu cuncettuale di l’annu 2026 cù meludie pop, yodel (tecnica vucale tradiziunale) è tecniche classiche muderniste.

In quant’à i musicanti iraniani Maliheh Moradi, Kiya Tabassian è Hamin Honari, prupuneranu “A voce di l'alba”, un viaghju in core di u cantu persanu. L’Italia serà riprisentata da Micrologus, un gruppu di musica medievale direttu da Patrizia Bovi, Interpreteranu Francesco, La natura e il divino, nant’à l’opere di Francescu d'Assisi, Hildegarde di Bingen è Raymond di Sabunde. A Francia cù Humanophones è u so cuncertu Antropus, cù pop alternativu è soul. L’Irlanda cù Seamus è Caoimhe feranu sente u sean-nós, tradizione vucale irlandese micca accumpagnata. Barzaz, trà cantu brittonu è musica strumentale. Jose Sanchez, Alberto Garcia è Reflets, da u baroccu à u flamenco. Rosela Libertad, trà tradizione pupulare argentine è paisaghji di a llanura, a piaghja in lingua spagnola. Infine, si senterà Rebecca Roger Cruz, canterina venezueliana pè l’ultimu cuncertu di i Scontri cù u so dischettu Río Abajo (cù rock è baroccu).

I Scontri di canti pulifonichi di Calvi ùn sò micca solu cuncerti a sera. A mane, à 11 ore, u 16 di settembre, u talianu Nicola Segatta presenterà Dal legno al suono, un prugettu ibridu trà cuncertu, attellu, teatru è sperienza immersiva. U 17 di settembre, un ascoltu publicu di l’archivii sunori di a funuteca di u Museu di a Corsica permetterà di ciuttà in u patrimoniu musicale cullettatu in u quadru di u prugettu Estru paisanu – Territorii sunori. U 18 di settembre, u specialistu di e musiche di u mondu Frank Tenaille animerà una mostra nant’à e musiche di e strade di a seta. Altra mostra da scopre : quella di Paul Salducci : tra sacru è stregheria : una storia di i riti è credenze corse è una pittura murale rialisata in direttu da u pittore sicilianu Alberto Ruce. E fotografie di i cuncerti di a vigilia, rialisate da Armand Luciani è Olivier Sanchez, seranu sposte ogni ghjornu mentre chì A Gazetta di u pulifonu, fatta da parechji disegnadori di stampa, hà da esce dinù ogni ghjornu. Infine, i Scontri si cumpieranu u 19 di settembre avec Calusgiule A' L'Ultimu, una serata cullettiva chì adduniscerà tutti l’artisti.