Da u 5 à u 20 di settembre, Aleria festighjeghja u so patrimoniu trà teatru, musica, ballu, mitolugia, fotografia, scontri è creazione cuntempuranea nant’à a tematica : “ci sò ghjunti i dei”. L’entrate à tutte l’animazione sò di rigalu. L’evenimentu si passa à u situ archeologicu è à u museu. Hè dinù in leia cù e Ghjurnate europee di u patrimoniu.

Primu spettaculu, sabbatu u 5 di settembre à 9 ore di sera nant’à u situ anticu, cù Médée è a participazione di l’attrice Caterina Murino ma dinù Marie-Paule Franceschetti, Lucille Delanne è Natacha Conti. Caterina Murino, sta famosa artista internaziunale à u sinemà è à u teatru ritrova a cumpagnia Teatr Europa pè sta creazione d’Orlando Forioso ispirata di Sénèque è d’Euripide. Médée, persunalità affascinante di a mitulugia greca, innamurata, strangera, maga è assassina, traversa i seculi è cuntinueghja à interrugacci nant’à l’identità, a passione, a maternità è a viulenza. 

Sabbatu u 12 à 9 ore à u situ anticu, Ariane è Attis, dui puemi di u puetu rumanu Catulle presentati da u teatru Démodocos cù Yanis Cleret, Diane-Iris Ricaud, François Trublereau, Philippe Brunet è Angéline Da Rocha. Adattazione bislingua è rialisazione di Philippe Brunet. Dui persunagi pè una doppia sperienza d’iniziazione in core di a mitolugia greca. St’iniziazione di i persunagi diventa dinù una nova scuperta di a bellezza persa di l’Anticu. Sò tutte l’opere d’arte o u stile di a perioda grecolatina. Cusì, rinviviscenu nant’à a scena ste persunalità di a mitulugia antica : Ariane, abbandunata da Thésée è dopu liata à Dionysos, è Attis, chì sacrificheghja a so virilità à a dea Cybèle.

Dopu, da u 18 à u 20 di settembre, e Ghjurnate europee di u patrimoniu : trè ghjorni pè scopre Aleria un’altra volta. Quist’annu, i temi di ste Ghjurnate sò u patrimoniu di a fotografia è u patrimoniu in periculu : rinvivì, resiste, rimaginà. In stu quadru, u serviziu di mediazione d’Aleria prupone visite cunsacrate à u patrimoniu anticu i 19 è 20 di settembre da dece ore à meziornu è da duie ore à quattr’ore à u museu è à u situ archeologicu. 

U 19 è u 20, u museu è a sala Vincentelli accuglieranu a mostra fotografica “Nant’à e vistiche di Phidias, Antonio Canova : antichità è mudernità”, cunsacrata dunque à u scultore neoclassicu Antonio Canova da dece ore à meziornu è da trè ore à sett’ore. Cù e fotografie di u napulitanu Camillo Massa, i dii, eroi è persunagi ispirati di l’Antichità ritrovanu una presenza nova. Sò e sculture magnifiche di Vènere (Vénus), Cupidon, Marzu, Endymion, Laocoon, i membri di a famiglia Bonaparte. Una mostra quì dinù pè un viaghju in a memoria di l’Antichità è in a so capacità à ispirà l’artisti assai tempu dopu l’epuca antica. Seguiterà un scontru cù u fotografu Armand Luciani nant’à a fotografia, a memoria è l’archeolugia. Armand Luciani si sprimerà nant’à a so sperienza ingiru à i scavi archeologichi d’Aleria. Scontru sabbatu u 19 à 4 ore, sala Vincentelli.  

Altra animazione : teatri di guerra : a guerra di i dii hè statuita : un feranu mai l’unione ! I 19 è 20 di settembre, mane è dopu meziornu, in u giardinu di u Palazzu Rossi, piazza di u Forte d’Aleria. 

Un percorsu teatrale itinerante è interattivu à parte da e fotografie di Camillo Massa.

Dodeci dii è persunagi di l’Antichità si sprimenu è si dichjaranu a guerra. U publicu seguita u percorsu cù una guida audiovisuale è scontra l’attori. 

U festivale prupone dinù di scopre Aleria in modu originale. A cumpagnia Primour presenterà Primour, Antidote Médée, una perfurmenza teatrale cù una spassighjata mischjendu testu, ballu è musica, nant’à u situ anticu venneri u 18 à 5 ore è mezu. A truvacci nant’à a piazza di u Forte. U publicu serà invitatu à marchjà cù l’artisti inde un’inchiesta ingiru à Médée, a catharsis (liberazione di l’emuzione forte) u pudere di u teatru chì guarisce. Una sperienza participativa chì invita à interrugà altrimente u famosu mitu di Médée. Cù a participazione d’Antonia Taddei, autora dramatica ; Cathy Pollini, curegraffa ; Marialuisa Capurso, cumpunitrice.

Dopu à a riprisentazione, à 6 ore è mezu di sera, u cercadore di u CNRS Erik Gailledrat hà da prupone una visita di prima trinca di i scavi è di l’anfiteatru d’Aleria. D’altrò, hè previstu un attellu participativu nant’à “Impegnassi pè u mare è i so figlioli i fiumicelli” dumenica u 20 di settembre à 4 ore è 20, piazza di u Forte. Una manera d’appruntà inseme u Matrimoniu di u Tavignanu cù u mare è riflette cullettivamente à i nostri impegni pè i fiumicelli è u Mediterraniu. Una stonda di discussione è di participazione aperta à tutti. Infine, pè u secondu annu, Festiv’Aleria Antica invita u publicu à participà à u Matrimoniu di u Tavignanu cù u Mediterraniu. In leia cù l’anziani rituali mediterranii di matrimoniu cù u mare, st’appuntamentu simbolicu prupone di rinventà inseme un ritu pè sprime u nostru impegnu à prutege u Tavignanu è u Mediterraniu. Manifestazione in cullaburazione cù Tavignanu Vivu è Terra di Leie - Terra di U Cumunu, frà i primi ch’anu signatu a Dichjarazione di i Diritti di u Tavignanu. Si passerà dumenica u 20 di settembre à 6 ore è mezu à a fine di u spettaculu Primour -Antidote Médée, nant’à u situ anticu d’Aleria.