Persunalità di l'umurismu è di a canzona corsa, Hubert Tempête, quasi novant'anni, hà ricevutu a medaglia di a cità di Bastia da Gilles Simeoni. Un omagiu resu à quellu chì face campà a macagna bastiaccia nant'à a scena, u spiritu di sta cità, di e so lingue, a so allegria. L'omu di e stonde felice, di e risate è di e macagne ma dinù di i lochi bastiacci mitichi oghje spariti cum'è u Ranch Mangano, u Paradis Terrestre o ancu a Pizzeria. In u filu di a so carriera, Hubert Tempête hà sappiutu ghjucà cù e parolle. Unu di i so più famosi successi, « Où vas-tu Bastia ? », cumpostu durante l'epupea di u SECB in u 1978, hè diventatu un'opera classica in u linguaghju cumunu quandu si parla di pallò o ancu di pulitica.