A 33 anni, Joseph Padovani face campà l’aiaccinu. Cù spressione, parolle è video, sparte un parlà ch’ellu cunnosce da zitellu. Una manera di fà sente una lingua menu presente in l’usi d’ogni ghjornu. Da a Sguizzera induv’ellu travaglia dapoi sett’anni, crea una pagina è cumencia à fà scopre stu vucabulariu fundendusi nant’à i travaglii d’Eliane Masia-Ristori è u dizziunariu di Rughjeru Miniconi. Ma prestu e parolle scritte ùn bastavanu più. Cusì, Joseph Padovani face sta sente sta lingua, e sunurità è a so prununzia, a cunghjucazione, i cugnomi… L’ogettivu hè di mustrà a ricchezza di a lingua. Cum’un riacquistu di l’aiaccinu. Certe spressione fermanu addunite à i so ricordi.

A cità portuaria d’Aiacciu hè stata in cuntattu cù sfarente pupulazione. Ci truvemu u genuvese in u parlà lucale. St’ultimu hè statu influenzatu da i parlà di i territorii vicini, in particulare a Cinarca, a Gravona, u Prunelli è u Taravu. CI hè in particulare u rutachisimu, vale à dì u fattu di prununzià una cunsunale qualunque in r : per esempiu, prununzià a Maronna piuttostu chè a Madonna, eppo u fattu di prununzià cù l’intricciata ghj quandu si dice pighjà, taghjà… allora chì in altrò si dice piglià, taglià o piddà, taddà.

Dunque cù facebook è instragram, u parlà aiaccinu trova un spaziu novu pè circulà è trasmettesi. E video permettenu di sente e prununziazione, e spressione ponu esse scuperte, riviste è spartute. U numericu diventa dinù anu ellu un arnese pè fà campà a lingua, pè parlà l’aiaccinu è scrivelu. In più, in stu modu stu parlà si face cunnosce fora di Aiacciu.