L’Unione dipartimentale di i persunali di u serviziu d’incendiu è di succorsu di Cismonte cuncoglie i gruppi Chjami Aghjalesi, I Voci di a Gravona, L’Arcusgi è Eppo. L’incasci anderanu à l’opera di i pupilli è di l’opere suciale di i spinghjifochi. Oghje ghjornu, una decina di zitelli nant’à u dipartimentu hè accumpagnata da l’opera di i pupilli di i spinghjifochi di Francia, chì festighjeghja i so cent’anni di sulidarità. A prufessione accumpagna i zitelli chì anu un parente mortu in serviziu o fora di u serviziu. Ogni volta ch’elli anu bisognu, in tutte e tappe di a so vita, a presenza discreta di i spinghjifochi hà da pruvà à cumpensà a sulitudine di i giovani.

St’accumpagnamentu ùn hè micca solu un aiutu finanziariu ma dinù un sustegnu psiculogicu o medicale, un aiutu in e stonde difficiule, organisazione di scontri è d’appuntamenti cullettivi. L’ogettivu hè di mantene una presenza à longu andà dopu a perdita d’un parente. D’altrò, a serata permetterà di finanzà a furmazione di i giovani spinghjifochi. Hè assicurata à u cullegiu di Luri, à a cità sculare di Corti è à a caserna di San Fiurenzu. Hè dinù una manera d’accumpagnà i giovani in u so percorsu prufessiunale. U sustegnu abbisogna mezi materiali. Ci volenu equipamenti pè a furmazione è devenu esse rinnuvellati in u filu di l’anni. Certe regione mancanu dinù di persunali.

Riservazione : helloasso.com o 06 83 03 14 01