Arrigistratu in chjesa Santa Maria Assunta di Mandriale nant’à a cumuna di Brandu, stu prugettu si fonda nant’à un scontru novu trà voce tradiziunale isulane, strumenti anziani è arte di l’impruvisata. Intitulatu “Cantà in cumpagnia”, hè a traduzzione corsa d'una citazione di u cumpunidore talianu Girolamo Dalla Casa di u 1584. L’opera si fonda nant’à u dialogu trà a pulifunia corsa è u Rinascimentu talianu cù l’impruvisata d’ispirazione ottomana (u maqâm). Senterete u canterinu talianu Enea Sorini, specialistu di a musica di u Rinascimentu è trè canterini tradiziunali corsi : Jean-Étienne Langianni, Michel Paoli è Daniel Gonet. In quant’à i strumenti, avemu sunurità anziane è strumenti più cuntempuranei. I canterini corsi ùn anu micca cantatu u so ripertoriu abituale ma à l’usu nustrale a musica scritta di u Rinascimentu.

Rimarchemu in particulare chì Canta in cumpagnia s’apre nant’à a leia stunante trà un testu d'un pastore d'Osani, cantatu da Michel Paoli, chì rispechja una strofa dopu à l’altra à Ecco la Primavera, un’opera di u XIVu seculu di Francesco Landini, cumpunidore è organistu. U dischettu prupone dinù pezze di u Laudario di Cortona, duie creazione è un omagiu à San Francescu d'Assise, pè l’anniversariu di a so morte 800 anni fà. Infine, sappiate chì un cuncertu di Camerata Figarella hè previstu ghjovi u 5 di nuvembre a à a catedrale Santa Maria di a citadella di Bastia à parte da 8 ore è mezu.