Fanfan Cesari hà cuminciatu à cantà à 14 anni in A Mannella di Corti induv’ellu era direttu da a so surella Rosanna è u so fratellu Pascal. Hà sempre avutu a passione di u cantu cù u chitarristu Charles Nicolini. Più tardi, hà cantatu in gruppi corsi. A tempu, Fanfan Cesari hà scrittu numerose canzone chì si trovanu in u dischettu “Chì ne serà dumane ?”

L’opera hè un omagiu à a muntagna per esempiu cù ste magnifiche rime Tu si per mè lu caldu è la timpesta. E di la machja si cusi bellu fiore, sai mischia lu pietu incu la festa è ne sai fà trizinà u mio core. Volu d’Altagna guardendu lu muvrone da lu Ritondu à u Monte Cintu rè patrone, e surgente ch’incantanu le stagione. Cara muntagna mi dai tanta passione ». In più, l’artistu hè statu succuridore durante 35 anni. Hà rifinitu i so testi à pocu à pocu durante e surtite in muntagna. Una passione nata quand’ellu cullava à e Gruttelle cù i so vicini i Gambini induve ammuntagnavanu cù e so bestie. Ma cù a dumanda di u titulu “Chì ne serà dumane?” u canterinu s’interrughjeghja dinù nant’à u nostru avvene postu chì a Corsica ùn sà induv’ella và. S’impenserisce di a perdita di i nostri valori, di u rispettu trasmessu da i nostri genitori, di i nostri valori essenziali.

D’altrò, ci truvemu un titulu cumuvente “I Fucilati”, cuntendu a storia di sti giovani corsi mandati à a guerra di u 14, ch’ùn parlavanu francese è fucilati perchè cunsiderati cum’è traditori. In quant’à altre canzone, una hè scritta da Ghjuvan Petru Ristori, Dà quassù, una di Natali Valli, Ti cuntempiu, è una d’Etienne Perfetti, Anarchia.