L’autore face vultà i lettori in a Corsica di l’anni nuvanta, perioda nera di a guerra trà naziunalisti. In core di u racontu, Petru Paulu Ottavi, orfanellu d'un babbu tombu chì sceglie di vindicassi. Cusì, diventa un omu ricercatu, cunvintu chì sta ghjustizia hè quella chì ci vole dopu chì a ghjustizia di l’omi li sembra avè fiascatu. Quì, ùn si tratta micca solu di cuntà u percorsu d’un banditu chì pianterà à mumentu datu e so derive. Ne smonta à pocu à pocu e certezze. A rinomina idealisata di u babbu, s’indebulisce quandu spuntanu elementi di a so participazione à un trafficu di droga. A fruntiera trà u ghjustu è l’inghjustu diventa incerta. È a viulenza, mantenuta da una ferita intima, strughje à mumentu datu quelli chì credenu ammaestralla. Altru persunagiu di u libru: Jean-Battì, cuginu di Petru Paulu, raprisenta l’impegnu nazunalistu clandestinu. Da giovanu, i dui omi eranu in u muvimentu nanzu di seguità percorsi sfarenti. Sta separazione hè unu di i fili pulitichi di u libru : da una parte a deriva individuale ; da l'altra, a fedeltà à una causa cullettiva, ella stessa tocca da e cuntradizzione di a so epuca.  

Jean-Guy Talamoni hà sceltu a finzione pè cuntà st’anni neri di u naziunalismu è à tempu rende un omagiu à militanti esempiari, chì fubbenu amichi, avendu sacrificatu a so vita pè a Corsica. Stu libru mette in scena cuscenze turmentate, fedeltà chì accecanu è scelte di persone chì ogni tantu ùn anu cuscenza di e so cunsequenze. A fine di u rumanu hà una forza simbolica maiò. L'ambiguità narrativa lascia u lettore fidassi à a so interpretazione nant’à a morte di unu o l’altru di i prutagunisti, di fronte à una redenzione firmata prumessa. Dunque, cù titulu “Morte d’un ghjustu” omu si dumanda quale hè ghjustu. Quellu chì vindicheghja u so babbu, quellu chì serve una causa o quellu chì ricunnosce i so sbaglii. L’autore ùn risponde micca in modu chjaru. Ma ricurdendu in sti dui persunagi una perioda turmentata di l’isula, a so dimarchja raghjunghje a citazione di Louis Aragon, pè dì a capacità di a finzione di cuntà a verità di un’epuca.