Una di e spiegazioni di a creazione di a massoneria si pò truvà in unu di i so scopi maiò chì dice ch'ella hè stata fatta per riunì ciò chì ghjera spapersu.
À u seculu diciottu a Gran Brittania venia di compie l'unione di l'Inghilterra, a Scozia, u paese Gallese è l'Irlanda. Nazioni differenti, più spessu nimiche chè amiche, religioni differente è un'odiu prufondu frà i populi. L'omi di bona vuluntà c'eranu, chì vulianu fà i paceri, ma e pussibilità di riuniscesi eranu poche, è sempre periculose : a massuneria fù istu locu ch'elli circavanu.
Hè quì ch'elli cummencianu l'imbrogli è e quistioni : cumu si pudia fà a pace ? Fendu chì iss'omi diventinu tutti listessi o in circhendu à fà ch'elli campinu issi populi inseme incù e so differenze.
Averete capitu u perchè di s'esempiu ch'aghju sceltu per cumincià u miò spostu.
Ùn parlu micca quì à nome di a massoneria, mà in appughjendumi nant'à i valori palesi ch'ella difende, circheraghju a dimustrà chì cuntradizione entrenu in sti valori pè a difesa, a prumuzione di e lingue dette minoritarie, ùn ci nè hè, à u cuntrariu.
A massoneria, in tutti i casi a maiò parte di a massoneria francese chì si dice adogmatica, hè sempre stata per a laicità è si sà chì a l'urigine di e leggi laiche chì anu corsu in Francia, ci sò uni pochi di liberi muratori.
Certi cunfondenu a laicità è e so leggi e i so regulamenti chì anu servutu a mettela in piazza.
À primu andà a laicità s'oppunia à u putere di a ghjesa catolica, à e persone è dinù à e strutture di a sucietà. Oghje issa realità hà cambiatu, è ghjè per questa ch'ellu ci vole à rivene à i so principii fundamentali.
Per permette a un'omu d'esse liberu ci vole à guarantilli a so libertà assuluta di cuscenza, vale à dì ch'ellu possi sceglie a so religione, e so idee filosofiche è pulitiche, in più è cum'è cunsequenza urganizà i spazii cumuni perchì s'omi differenti possinu campà inseme.
Quandu ellu hà urganizatu a scola Jules Ferry, avia u penseru chì l'omi di istu paese appiinu in cumunu un minimu di cunniscenze : leghje, scrive, cuntà, è una lingua cumuna, l'idea era, è ghjè sempre bona.
Ùn pensava micca è l'hà detta in e so circulare, tumbà e lingue è e culture minuritarie chì tandu in Corsica per esempiu era più forte è più prisente chè a lingua è a cultura francese.
Si sbagliava Jules Ferry (o ci hà sbagliatu) perchè in tagliendu a lingua corsa da l'amparera, ci hà fattu perde a pussibilità di serve l'evuluzione di u mondu, è l'hà ridutta à ciò ch'ella hè avà.
Ma u peghju hè chì certi à nome di ciò ch'elli pensanu esse a so santa laicità, credenu ch'ellu hè cusì ch'ella a da esse.
A questi li pongu issa quistone :
Puderà esse liberu un' omu in Corsica, si omu li torce a pussibilità d'avventà à a nostra lingua è dunque à a nostra cultura ?
Serà pussibile di dì à un zitellu à nome di a laicità : serai sordu è mutu à a lingua è à a cultura d'un mondu induve tù campi ?
A massoneria prumove a tulleranza, quale hè u più tullerante quellu chì vole chì tutti quelli chì campanu quì appiinu accessu à a nostra lingua è à a nostra cultura, o quellu chì ùn a vole permette chè à certi.
A massoneria dumanda a i liberi muratori di travaglià à l'ameliurazione di a sorte di l'umanità.
Serà megliu dumane u mondu s'elle smariscenu e lingue è e culture minoritarie ? Ognunu sà chì s'ellu ùn si face nunda, s'anu da perde.
A massoneria hè associu attacatu à l'idea d'una republica una è indivisibile. Parechji forse una magiurità pensanu chì " una " ùn si pö cuncepì chè in l'unifurmità !
Eiu sò republicanu, tantu in corsu chè in francese, è ùn vegu micca ciò chì indì a nostra lingua è a nostra cultura , ci forzerebbi à esse o à ùn esse demucraticu.
- U mottu di a framassoneria hè libertà, parità, fratellanza.
A libertà ùn hè micca a pussibilità di fà n'importa chè. Hè di fà ciò ch'omu vole indì u rispettu di l'altri è ci impone certi duveri, l'istruzzione in generale è per esempiu, l'amparera di a lingua francese sò per qualchisia chì campa in Francia, elementi indispensevuli per l'eserciziu di a libertà è nimu a si piglia à male quandu un zitellu hè ubligatu d'andà à a scola è d'amparacci u francese.
Allora perchè in Corsica seria una pastoghja à a libertà l'ubligazione d'amparà in più di u francese, a lingua corsa.
Ùn seria megliu à nome di a libertà, di permette a tutti di capì ciò ch'ellu si dice in piazza à u paese o à u nutiziale di Michele Castellani ?
A parità. Si a parità ci impone di parlà tutti in Francia una listessa lingua seremu più pari noi altri in Corsica, s'ella smarisce a nostra lingua nustrale. Ùn aghju mai intesu quelli chì a pensanu, cuntinuà u so ragiunamentu, è dumandu per chì no siamu pari, ch'elli ci mettinu tutti à u RMI.
E si a parità hè cumu a pensu quella di i diritti ch'elli ci dianu ancu à noi, u dirittu di salvà a nostra lingua è a nostra cultura.
Per ciò chì cuncerna a fratellanza ùn diceraghju chè una cosa : chì possu offre di megliu a i furesteri chì venenu a campà quì, chè a miò lingua è a miò cultura, perch'elli sianu di i nostri tuttu in firmendu ciò ch'elli sò.
Si a framassoneria hè ciò ch'eiu pensu ch'ella hè, mi permette d'esse ciò ch'eiu sò, di pensà ciò ch'eiu pensu, è di pensallu in corsu cum'è in francese.