U Bambinu hè natu
(Canticu di Natale)

Era bughju pagnu
è notte dulore
ma dopu à u lagnu
un cantu hè falatu
à innacquà u core :
u Bambinu hè natu !

Intesa la voce
vensenu i pastori
pè bocca è pè foce
anu viaghjatu
tutti à corri corri
u Bambinu hè natu !

E la giuvanotta
di a carciulella
curendu in la grotta
u figliu calatu
canta dinù ella :
u Bambinu hè natu !

Eranu tanti anni
ch’ellu s’aspittava
sò compii l’affanni
d’ogni malavviatu
chì s’addispirava :
u Bambinu hè natu !

Da monte è da serra
u populu schjavu
l’omu di a terra
venutu hà cantatu
a gioia di u bravu :
u Bambinu hè natu !

Ma tutti i ricconi
d’oru è di putere
stanu penciuloni
à capu calatu
pè ùn sente nè vede
ch’u Bambinu hè natu.

Di u cantu u perchè
l’era misteriosu :
ci fubbe ancu un Rè
Erode chjamatu
chì l’hà d’arme chjosu
u Bambinu natu

Ma ùn valse u ferru
pè li puverelli
di u mondu interu ;
cantanu di fiatu
vechji è zitelli :
u Bambinu hè natu !

E sette chjappelle
Ghjacumu FUSINA