Cantu Natalecciu

Paese chì ghjace
À pede di monte
Neru l'orizonte
È celu bambace


 È l'annu si tace

 Chì franca lu ponte
La so stella in fronte
Ci porta la pace


 
 Quì ci hè poca ghjente
Ma quì ci hè a fede
Da scaghjà a neve
Da piglià sumente


 
 Ci hè quellu chì sente
È quellu chì vede
È sempre un parente
Ch'ùn ci vole crede


 
 Ci hè boi è sumeri,
Longu à lu stradone
Chì anu u calafrone
Di li tempi d'eri


 
 Quandu li penseri
in u carciulone
Eranu à viaghjone
à lochi strangeri


 
 O sì u Bambinellu
Ci dessi, sicuru
U pane futuru
È spiche à granellu


 
 Tandu lu zitellu
Campessi ellu puru
Da omu maturu
Cù lu so fratellu


 
 Or femu addunenza
Case viote o piene
Ch'ella spinga e pene
Di sogni esistenza


 
 Cali a distenza
Rompinu catene
È lascemu à vene
Tutta issa sperenza


 Natale hè venutu
astutu astutu
Natale hè falatu
beatu.


 Ghjacumu FUSINA