L'ADECEC face a ghjurnata di a memoria

"Guerra di u 14... tandu cambiò tuttu »: ghjera stu tema di u ricordu chì l'ADECEC hà sceltu pè urganizà a so tradiziunale "ghjurnata" in cunventu San Francescu di Cervioni.

E cunferenze successive di Vanessa Alberti, Pauline Sallembien, Didier Rey, Marc-Paul Luciani, Anghjulu Santu Pietrera è Sylvain Gregori, anu rammentatu à u publicu quantu a lingua corsa pudia fà prò à u murale di e truppe, cù l'esempiu di u giurnale "Corsica" di Maistrale, ma dinù quantu sti giovani suldati pudianu mantenesi cù u ricordu di a so Corsica, veru riferimentu murale, è di regula s’hè insistitu nant’à l'isula chì hà pagatu e pene ecunomiche è suciale di stu cunflittu, avenduli cacciatu quasi tutti i so omi in salute. Valutazione di e cunsequenze di a greva ch’ùn sò micca listesse, parcorsi cullettivi è individuali, piazza di a literatura, sò tanti duminii d’infurmazione purtati à u dibattitu, ma parechje dumande fermeranu senza risposta.

Cent’anni dopu, malgradu a tristezza, l'ADECEC hà cuntribuitu à fà rinvivì sti corsi partuti à guerrighjà, luntanu, cusì luntanu. Induve u destinu di parechji tandu cambiò in tuttu.

Umagiu à u suldatu Raffini

Accant’à u prugramma di cunferenze, in u chjostru di u cunventu, si scupria una spusizione in leia cù un travagliu di memoria nant'à a Grande Guerra, da a classa d'Amandine Ribaut di a scola di Bravone, in Linguizzetta. L’elevi anu travagliatu nant’à un suldatu mortu pè a Francia, natu in Linguizzetta, Thomas Raffini, suldatu di seconda classa di u 10u regimentu d'infanteria di a 9a cumpagnia. Thomas Raffini hè mortu u 19 di maghju di u 1917 à 28 anni, à u fronte di Mesnil-les-Hurlus. Decuratu cù a croce di guerra, era un suldatu "curagiosu è di canerchja, chì tutt’ognunu rimarcava quand’ellu cumbattia", à sente i so superiori. Una parte di a so famiglia si ne stà in Cervioni.

Cliquez sur l'image pour visionner la galerie