Fala babbuchju natali
Da i monti è da i vaddi,
Par sparta Gioia è piacè,
Feti ch’iddu ùn si scordi di mè

Sigura chì sogu un isula vechja
Par creda sempri in u barbutu
Ma ùn sogu ancu crechja
Chì i « Maya » ci hani sbagliatu

Sigura ch’ùn sò stata brava,
Mà qualchì scusa a possu avè
À chì si penta à chì si lava,
À tutti i mei ùn dicu avvè
Quand’una casa andaia di mali
Un ziu preti li si prigaia
Senza puri essa cridanciuli
Qualchì miraculu prighemuià

Unghjunu incù a so fedi
In qualchì diu ch’iddu sceddi,
O fedi in a natura
In l’amori o in i futura
S’idd’ùn hè Babbu Natali
Pò essa quiddu di a patria
Basta ch’iddu ci senta à pena
Par dacci curaghju una cria

Un curaghju par dì di nò
À ciò ch’ùn si pò acquittà
Un curaghju par dì di sì
À un avvena sceltu cusì

Un avvena di dignità,
Di travaddu, valori è di paci,
Un avvena di carità,
Aiò chì sparta semu capaci !

Di st’isula pinta di sangu
Pulimuni monti è vaddi
Chì u russu fussi focu
Di spiranza in ciò ch’accadi
Avà, gudettivi à stu Natali
Senza più pinsà à mali
Bon dì, bon’annu,
È bon capu d’annu …

In Grazia di qual’ Babbu vo vi scidditi …