U Catenacciu

Inde a stretta, ecculu chì s'avvicina
Cù u so sguardu di sudore cupertu
Sì u s'amicu, è tù sì a so vicina
Per fà perdunà i vostri peccati s'hè offertu.

Cerchi di vede a so lacrimosa faccia
Ma avanza, cum'è tant'altri sacrificati.
Unu à unu u peccatu si caccia
D'iss'omu ch'ha vugliutu sguassà i vostri peccati.

In ghjinochji cù fede, tù o peccadore
Guarda cù speranza issa croce
L'arburu induve hè mortu u Signore
Fà sente e to lacrime cù a to voce.

Ogni ghjornu nant'à a croce l'ai inchjudatu
Ellu, u Cristu, senza nisun peccatu.

Un travagliu da Petru-Ghjuvanni Bresciani
(Puesia di Carlu Ghjuvanni Paoli, scritta in Venzulasca di nuvembre di u 1991, esciuta in a rivista d'infurmazione culturale A Lettera, 1994, A Stampata.)
(Ritratti di Anghjula Ghjiseppa Bresciani Paoli)