U Luni di Pasqua in Carghjese

A messa catolica di u ritu bizantinu si compie. I fidi sortenu unu à unu da a chjesa greca. È u sole, cum'è tutti l'anni, apparisce daretu à i nivuli per schjarì a prucessione. I cunfratelli di San Spiridionu ingiranu a porta d'entrata. Da una sepa di fucili esce una plutunata per cumincià u caminà di i fidi daretu à e bandere di e cunfraterne di San Spiridionu, patrone di Carghjese (in rossu) è di Sant'Antone (in turchinu).
Daretu à e bandere, l'ufficianti è l'archimandritu Florent Marchiano cù e tenute ingallunate d'oru, eppo daretu à a fiura santa, si stringhje a folla di i fidi.
À ogni crucivia, i giovani chì portanu un fucile, facenu una plutunata. A resurrezzione di Cristu deve esse annunziata cù fracassu.
L'aria si carca di muscu d'incensu è di venene di fucilate mischjate. À u ritimu lentu di u " Kyrie Elieson " intunatu da e voce grave di l'omi è ripigliatu da e timbre più legere di e donne, u longu seguitu ricolla e strette scuscese di u paese, sin'à a croce di a crucivia di Paomia chì supraneghja a campagna vicina.
Monsignore Florent Marchiano hà rializatu dopu a tradiziunale benedizione di e campagne. Dumandendu à u Signore di risparmià i campi da a grandina è da l'incendiu, è chjamendu a grazia divina annant'à e racolte future per i zitelli di Carghjese.
A prucessione volta dopu, per e strette versu a chjesa greca, cù u ripigliu di u "Christos Anesti !" (Cristu hè risuscitatu) intunatu in coru da i fidi, per rimette à a so piazza, in a naveta, a fiura santa purtata da e cunfraterne di San Spiridionu è di Sant'Antone.
E fucilate facenu parte di i riti d'alegrezza di i fidi è ùn sò micca una demustrazione guerriera, ma un salutu à u Rè di u celu. Cum'è ind'è i rè di a terra, si saluta a nascita di i bambini è tutti l'evenimenti felici da qualchi cannunata…
Per i più curagiosi, a ghjurnata si finisce cù una merendella in famiglia o trà amichi.

Un travagliu da Petru-Ghjuvanni Bresciani