A festa di l'ove in Balagna

Cumpiendu e celebrazione di a settimana santa in Curbara è Aregnu, in Balagna, e tradiziunale messe è prucessione di u luni di Pasqua, sò state l'occasione per i fidi di ritruvassi numerosi, per festighjà a gioia di a resurezzione…in a fratellanza di e merendelle.
In a messa ch'ellu hà celebratu in a cappella San Curneliu-San Ciprianu di Curbara, nanzu à a prucessione di e reliquie è statue di i santi (martiriziati in u 258 in Carthage) ingiru à l'edifiziu, u patre Olivier-Marie, priore di u cunventu di Curbara, ha ramentatu à i zitelli presenti u sensu di a benedizione di l'ove di Pasqua.
" L'ovu hè surghjente di vita, cum'è Cristu " hà dettu, " surtite da e vostre chjoppule, siate vivi è purghjite amore ingiru à voi… ".
L'ove benedette da u patre Olivier-Marie anu incantatu i zitelli in u corsu di e partite tradiziunale di chjucaru, dopu a ceremunia, chì si facianu per a merendella urganizata da l'associu " Memoria di u seculu ".
Davanti à a cappella di l'Annunziata, in Aregnu, a messa hè stata celebrata da u patre Harold, priore di u cunventu di Marcassu.
Una ceremunia imbellita da a presenza di e cunfraterne di San Stefanu-Sant'Antone avendu interpretatu i canti è purtatu a statua di San Ghjiseppu è di a Vergine Maria in prucessione.
Un'ardente Dio Vi Salvi Regina hè statu cantatu nanzu à a benedizione di l'ove.
Quì dinù una bella merendella riunisce i fidi dopu e celebrazione religiose.

Un travagliu da Petru-Ghjuvanni Bresciani