E ceremunie di Pasqua in Erbalonga

I preparativi sò assai fibbracciulosi per a settimana santa in Erbalonga. Ottu ghjorni nanzu, e palme sò tagliate è messe fora di u lume per ch'elle sianu torna chjare.
E "pullezzule" essendu u nome di st'intricciature. Ne pudete vede in u museu etnugraficu di Bastia è di Cervioni o dinù in a cappella Santa Croce in Purettu Brandu. In Erbalonga, si face torna ste pullezzule : croce o stelle à ottu rami. Sò date à u prete per ch'elle sianu distribuite à a ghjente a Dumenica di e Palme. A distribuzione in chjesa si face di prima per l'omi, è dopu per e donne. Stu ghjornu si face una prucessione cù a Croce ornata di palme intricciate, un'omu vestutu d'un camisgiu a porta, hè seguitatu da u prete, i zitelli, l'omi è e donne.
Per stallà l'altarinu di u Ghjovi Santu in a chjesa d'Erbalonga, l'omi si danu di rimenu perchè ci vole à fà un baldacchinu tamantu : u tendone. Si caccia a statua di San Ghjisè, si alza u tendone, è cusì si ponu mette i tappetti, i fiori, u granu germinatu, e candele… U Cristu ci sarà depusitatu.
Intantu, e donne facenu e palme per a Cerca, a Granitula, e prucessione di u Vennari Santu.
Ognunu face a so palma, dopu sò aghjunghjite per ottene una croce. Ghjè un travagliu chì abbisogna pazienza, calmu è attenzione. Si dice chì in Erbalonga, ùn si travaglia in listessu modu chè in Pozzu o Purettu, ma e mane giovane o vechje, sgualtre, travaglianu, ci vole minuzia per realizà i mazzapani, rami tamanti chì cumponenu a croce finale.
U lindumane, ghjè a muntatura di i rami, un'affare assai longu, ci vole à taglià u soprapiù, cosge, attaccà, rilegà l'armature metalliche. Fattu u travagliu, i capi d'opera sò purtati in chjesa è e croce ne sò ornate, quelle di l'omi è di e donne.
Si mette un fioccu violu, da a punta di a croce sin'à e duie bracce.
Dopu a messa di u Ghjovi Santu, u Santissimu Sacramentu hè purtatu da u prete sin'à l'altarinu, quattr'omi sustenenu un baldacchinu sopr'à u capu di l'uffiziante.
A sera, i cunfratelli mettenu i camisgi, piglianu e mazze, tutt'ognunu s'addunisce davant'à l'altarinu, parechji canti bordi è arghiti si sentenu in a notte. Ghjè una stonda cumuvente. Trè cunfraterne si mettenu in capu di a prucessione, i zitelli portanu i torchji, e donne cantanu, e trè croce anu da sorte, una sola ornata d'un velu biancu, dopu quella di l'omi è quella di e donne, a prucessione si ne và versu u cunventu è entre in a cappella.
E croce sò piazzate davant'à l'altarinu, e cunfraterne s'addinochjanu, una voce canta u Stabat Mater, u coru di e cunfraterne l'accumpagnerà dopu.
Ghjè una stonda maiò è a natura dramatica di u Misere Nostri cresce stu sentimentu.
A prucessione rivolta in Erbalonga. In a chjesa davant'à l'altarinu sarà fatta a stessa ceremunia. Canti, preghere …

Eccu chì cumincia u Vennari Santu, un ghjornu maiò : ghjè u ghjornu di a Cerca !
Un nome stranu, appena cum'è a prucessione : a Cerca, a ricerca, da u nome circà. Sò sett'ore è mezu, trè masseri di capu marchjanu davanti, dopu un'omu porta una croce ornata d'una velu biancu. A croce maiò cù u Cristu, a croce di l'omi, assai pisia, ornata di palme intricciate preparate da a ghjente d'Erbalonga, hè purtata da un'omu solu è scalzu.
L'omi di a cunfraterna seguitanu cù una pianeta bianca, in duie culonne, un masseru viaghja cù a so mazza. E donne raghjunghjenu a prucessione, una porta a croce di e donne, ornata di palme intricciate, l'altre marchjenu in duie culonne dinù, cum'è l'omi, duie masseri assicureghjanu l'ordine.
E donne sò vestute da una rota turchina rimuntata sin'à u capu : a faldetta. Nanzu era fatta di seta, è trasmessa da mamma à figliola.
A prucessione parte da a piazza à a chjesa, pianta in a cappella di Notre-Dame di u Mont-Carmel, passa per u Musuleu, a cappella Santa Catalina, u Castellu...
I canti si sò trasmessi à bocca è sò stati mudificati rispettu à i testi greguriani, u Stabat Mater hè cantatu annant'à parechji temi sfarenti, è a fine di a strofa hè cantata da tutt'ognunu. Cumincia tandu a sfilata davant'à u Cristu ghjacente. Una donna canta e lode di u Vennari Santu quandu a ghjente esce. U ritu hè fattu in listessu modu davant'à ogni altarinu.
A prucessione colla sin'à a cappella San Ghjisè, 300 metri d'altitudine, passa per Pozzu, Purettu, si ne fala versu a chjesa di Notre-Dame di Lavasina è raghjunghje à Erbalonga per a costa.
I zitelli manghjanu i canistrelli, l'adulti si riposanu, manghjanu appena, si canta davant'à tutti l'altarini. A ghjente discute appena caminendu, ma si canta dinù. Quandu si vede stu spettaculu da luntanu, ghjè una visione bellissima ma dinù strana d'una longa culonna chì camina à traversu a machja.
E trè altre cunfraterne di i paesi di Pozzu, Castellu è Purettu, facenu dinù a Cerca è passanu da i stessi altarini, mà micca à tempu. E prucessione viaghjanu in sensu oppostu à e sfiere d'un riloghju è ùn devenu maì scuntrassi.
Quandu a prucessione ghjunghje in Erbalonga, i participanti sò quasi tutti stanchi, u viaghju hè statu longu, più di 12 chilometri, cullate, falate, l'ultima piantata sarà apprezzata.
A Cerca serebbe a ricerca di a penitenza per spià i so piccati è cumunià cù Cristu mortu per a nostra benedizione.
A sera, ci hè un'altra prucessione : a granitula cù i listessi participanti, ma i torchji sò più numerosi perchè face notte. Annant'à a piazza, u circulu largu piglia forma, i canti collanu, u cìrculu si stringhje, e croce giranu è risortenu, a prucessione si svoglie, passa per e strette nanzu di vultà annant'à a piazza per fà a Croce Latina.
Sta volta, i participanti sò in una sola culonna, cantanu i cantichi, i masseri si piazzanu in quattru punti chì simbulizeghjanu a Croce, è à u centru, l'omi è e donne anu da sfilà in linea diritta, fà u giru di u masseru è riparte in angulu dirittu, fora di quand'elli sò à l'estremità di a Croce induve a rutazione sarà di 190 gradi. Dopu a croce si sface, e duie culonne si riformanu è a prucessione raghjunghje a chjesa Sant'Eramu induve e croce saranu appese, aspettendu un'annu a prossima festa di Pasqua.

Un travagliu da Petru-Ghjuvanni Bresciani
(Testu uriginale di Marceau Sanguinetti, esciutu in francese in a rivista
d'infurmazione culturale " A LETTERA ", Nu 10 , A Stampata, 1994)
(Ritratti di Marceau Sanguinetti è Anghjula Ghjiseppa Bresciani Paoli)