E tradizione di Pasqua in Corsica

A Corsica hè un paese di religione cristiana, è a populazione si primureghja assai di certe pratiche religiose.
A dumenica di l'Alivu insegna l'iniziu di a settimana santa.
Dopu a benedizione di e palme chì si presentanu sottu a forma di crocette, di pesciu, di stelle, accumpagnati di rame d'ulivu, s'urganizeghja a prucessione tradiziunale seguitata di u ritu di chjusura è d'apertura di e porte cunnusciutu in a liturgia cù u nome d'" attolite portas ". Sta ceremunia si passava tandu fora di a chjesa, oghje si face solu u giru di a chjesa.
Dopu a benedizione di e palme, e famiglie appendianu e crucette in casa, in segnu di prutezzione.
In Corsica, e ceremunie di u Ghjovi Santu è Vennari Santu sò sempre state festighjate cun fervore : altari spugliati, statue ricuperte d'una vela viuletta, a spinta di i cironi ne era l'iniziu.
Da un puntu di vista ceremuniale, ste pratiche anu un elementu cumunu : e prucessione, chì ponu cambià secondu i lochi.
Tandu, si chjamava A TRIFUNA, sta fila di penitenti vestuti d'una pianeta bianca, incappuccinati, è cantendu u " Storpiato Misere ".
St'usi si facenu torna oghje, ghjè cù e ragane, ratachje, trapachje chì i zitelli annuncianu l'iniziu di l'Uffiziu di e Tenebre. Sta ceremunia si face in giru à un candileru triangulare, cù 15 candeli. Dopu ogni salmu, un candelu hè spintu. Quandu l'ultimu, chì si trova in punta di u triangulu, hè spintu, a chjesa hè in u bughju, cummincianu allora i rumori di e ragane è di i bastoni pè cacighjà i demonii.
In tempu di settimana santa, i vegetali sò assai ricercati : palme, fiore, granu è lentichje chì sò messe à germinà è piazzate davant'à l'altarini.
Sò e cunfraterne chì mantenenu e tradizione di a settimana santa, urganizeghjanu, dirigenu è cunducenu e prucessione.
Secondu u locu (Cismonte o Pumonte), l'usi ùn sò listessi è anu un nome sfarente :
a Cerca (Brandu), a Granitula, a Parata (Casinca) in Cismonte.
U vennari santu, i paesi sò illuminati da centinare di candele messe in i tufoni di e case o annant'à e finestre. A prucessione si passa in i carrughji è e strette di u paese, a ghjente canta " Perdono mio Dio " è " Miserere ".
In Balagna, in Muru, e cunfraterne si riuniscenu per a prucessione, ghjè u prete, vestutu d'una pianeta rossa, chì porta a croce, eppo secondu a tradizione, si serve a suppa di ceci chjamata " Cena Domini " per u Ghjovi Santu.
In Calinzana, u Ghjovi Santu, l'Uffiziu di e Tenebre hè seguitatu di " a lavanda " è di a distribuzione di canistrelli benedetti. U Vennari Santu, una cuncolta hè urganizata per a viacroce è per a Girandula.
In Bastia, u crucifissu di i miraculi, u Cristu Negru, hè purtatu in prucessione u Ghjovi Santu da i cunfratelli, scalzi è capuchjati. A viacroce si passa in e strette di a citadella.
A Granìtula, fatta u Vennari santu in certi paesi, hè una prucessione in spirale, un'usu assai difficiule à realizà.
In Pumonte, ci sò parechji usi sfarenti :
u Catenacciu (ghjè quellu di Sartè u più cunnisciutu) , hè una ceremunia assai penibile per u scunnusciutu capuchjatu, solu u prete cunnosce a so identità.
In Bunifaziu, ogni quartu hà a so cappella è cunfraterna, I Casci sò purtati in prucessione u Ghjovi è Vennari Santu.

A Settimana Santa si compie cù a festa di Pasqua, sta resurrezzione porta e so feste è allegrezze, e case sò pulite, e fulighjine sò fatte, i mobuli spiazzati, tandu si pichjava annantu per fà fughje e forze di u male, ci serà a benedizione di e case da u prete, i forni sò accesi per e preparazione è biscotti di Pasqua.
Parechji " Alleluia " allegri ribombanu in e chjese è sott'à e volte di i paesi…

Un travagliu da Petru-Ghjuvanni Bresciani
(Testu uriginale di Marie Amélie Racon, esciutu in francese in a rivista
d'infurmazione culturale " A LETTERA ", Nu 10 , A Stampata, 1994)
(Ritratti di Anghjula Ghjiseppa Bresciani Paoli)