Gastronumia di Pasqua

Durante u tempu di quaresima, l'astinenza era rispettata di più chè à i ghjorni d'oghje, ove, casgiu, butirru eranu pruibiti, i ripasti oghjinchi si cumpunianu di pustimi secchi (ceci) soprattuttu pè u Ghjovi Santu, qualchì pesciu, baccalà è arringa, cereale è frittelle (senza ove), cù erbiglie o inzuccherate secondu e sosule di Maria Nunzia Filippini in u so libru " La cuisine Corse ", libru esciutu in u 1965 à l'edizioni di a Spusata.

Frittelle di a Settimana Santa :

Sguaglià una noce di levitu di panatteru cù appena d'acqua tepida salita, ci si aghjunghje un bichjeru di fiore, s'impasta tuttu què cù e mani poi si lascia ripusà ista pasta sottu à un tuvagliolu durante duie orette.
Ci vole chì l'oliu sia bullente, si piglia ista pasta à frighje, si incionfa in l'oliu bullente, lasciate culurì e frittelle, cacciatele da l'oliu, sgottatele, e pudite manghjà sia inzuccherate, sia accumpagnate di mele.

Fugazzi o schiacce di u Venneri Santu à modu bunifazincu :

Impastà un chilò è mezu di fiore incù 500 grammi di zuccheru, un mezu bichjeru d'oliu, un mezu bichjeru di vinu biancu, stende a pasta cù u rotulu, taglià bastellucce tondule, incisà a pasta, è tufunalla per impedilla d'ingunfià, inzuccherate e bastelle, aghjunghjiteci appena di pastizzu sopra è fate coce à fornu muderatu.

Poi vene u tempu di Pasqua, l'abbundanza si trova nant'à i tavulini, i pranzi sò più elaburati, cù una scelta d'antipasti. A famiglia hè adunita in l'alegria d'istu ghjornu di u rinnovu. Dipoi ch'omu si ricorda di l'agnellu è di u caprettu, facenu parte di u pranzu di a dumenica di Pasqua, sia arrustiti accumpagnati di pustimi, sia appruntatià a stretta, ben intesu cù e paste o i gnocchi.
I dulciumi chjamati secondu i sfarenti rughjoni : " panette, canistrelli, canitroni o canestri " sò arumatizati à l'anice, à l'aranciu secondu l'usi di a lucalità, appruntati da e donne cucenduli in u fornu accesu apposta per l'occasione, i zitelli è l'omi di u paese s'occupanu di e legne è di i fasci di scopa per alimentà u fornu.

I campanili o i caccavelli :

S'appronta u levitu a vigilia.
Impastà cù u latte, un ovu, zuccheru, butirru, è un zinzicu di sale, appena d'acqua. Per falli muscà, aghjunghje l'anice. Dalli a forma d'una curona, poneci nantu un ovu o duie per a decurazione. Tradiziunalmente i campanili cù un ovu eranu dati à ogni zitellu. Sti campanili chì abbisugnavanu assai tempu durante u so approntu, si facianu in cumpagnia di a famiglia o di u vicinatu.

I migliacci :

Eccu una sosula secondu Rosa Graziani, di Campile.
A vigilia appruntà u levitu cù 500 grammi di fiore. U lindumaitina aghjunghje trè ove sbattute per ogni chilò di fiore adupratu, un bichjeru d'oliu per ogni chilò di fiore, latte tepidu, un zinzicu di sale, impastà tuttu què. Poi ricopre è lascià ripusà. Quandu a pasta principia à ingunfià, aghjunghje u casgiu frescu sbrisgiulatu, imbulighjà bè tuttu, aghjustà torna appena di latte. Mentre chì a pasta principia à fà e bullicine, a pudite accuncià nant'à e fronde di castagnu (appruntate capunanzu trè fronde in u sensu di a lungura è una messa in u sensu oppostu, tenute inseme cù pezzi di scopa secca), inciaccate appena a pasta cù u piattu di a manu, aghjunghjite pezzi di casgiu, punite nantu à i migliacci un mischiu fattu d'ove sbattute è latte, per ch'elli sianu bè innorati quand'elli esceranu da u fornu. Puniteli in u fornu è cacciateli solu quand'elli seranu belli culuriti.

U Luni di Pasqua, à mumentu datu, era l'usu di a merendella in famiglia, pranzi pigliati in cumunu in i prati circunvicini, è cumposti d'ove bullite, di roba purcina, frittate, casgiu è ben intesu campanili o caccavelli.
Oghje ghjornu a merendella di u Luni di Pasqua hè di più un'affare di zitelli chè di ghjente maiò, quelli di u paese si ne vanu in campagna alegramente à festighjà sta tradizione cum'è pè u Luni di Penticosti.

Un travagliu da Petru-Ghjuvanni Bresciani
(Testu uriginale di Anghjula Ghjiseppa Bresciani Paoli, esciutu in francese in a rivista d'infurmazione culturale " A LETTERA ", Nu 10 , A Stampata, 1994)
(Ritratti di Anghjula Ghjiseppa Bresciani Paoli)